Бу көннәрдә Татнетны үстерү фонды каршында эшләп килгән жюри әгъзалары III Республикакүләм "Яшь татнетчылар" интернет-проектлар бәйгесенә килгән сайтлар белән танышып чыктылар һәм җиңүчеләрне ачыкладылар.

Бәйге инде өченче ел рәттән Татнетны үстерү фонды һәм Татарстан Республикасы Яр Чаллы шәһәре «Мулланур Вахитов исемендәге 2 нче гимназия» муниципаль бюджет гомуми белем бирү учреждениесе тарафыннан оештырыла.

Бәйгедә быел Татарстанның 8 шәһәре һәм районыннан (Актаныш, Арча, Әлмәт, Иннополис, Кукмара, Лениногорск, Мөслим, Яр Чаллы) 15 бала катнашты. Алар арасыннан 5 бала - башлангыч сыйныф укучылары, 10 бала - уртанчы сыйныф укучылары.

I-IV һәм V-IX сыйныф укучылары арасында нәтиҗәләр аерым ясалды. Жюри әгъзалары 7 сайтка призлы урын, ә калган сайтларга - лауреат дипломын тапшырырга карар кылдылар.

Быелгы бәйгедә призлы урын алган сайтлар белән Белем.ру порталы укучыларын да таныштырабыз. Алар:

• bezmek.jimdo.com (Кыңгыраулар сайты - Лениногорск),
• gulnaraa.jimdo.com (Шагыйрә Гөлнара Әюпова сайты - Әлмәт),
• joldyz.clan.su (Өмет йолдызы - Кукмара),
• tabigat.ucoz.ru (Мин - табигать баласы! - Кукмара),
• akkuzsait.jimdo.com (Туган авылым минем - Аккүзем - Актаныш),
• dusluk-bakchasu.jimdo.com ("Дуслык" балалар бакчасы - Яр Чаллы),
• sainur.jimdo.com (Айнур сайты - Актаныш).

Бәйгедә катнашучыларны һәм җиңүчеләрне бүләкләү тантанасы 16 май көнне Яр Чаллы шәһәренең Мулланур Вахитов исемендәге 2 нче гимназиясендә үткәрелер, дип планлаштырылган иде. Якын көннәрдә барлык катнашучыларга тантананың төгәл көнен/вакытын хәбәр итеп хатлар җибәреләчәк (+ бәйгенең төп мәгълүмати иганәчесе булган Белем.ру порталында әлеге яңалыкка комментарий буларак мәгълүмат куелачак).

Оештыручылар һәм жюри әгъзалары исеменнән барлык катнашучыларны тәбрик итәбез һәм бәйге тантанасында Яр Чаллы шәһәрендә көтеп калабыз!